Alkejenje

Elikadura-propietateak

Erkamezti arruntaren osagai nagusia ura da. Karbohidrato ugari ematen ditu, baina gantz eta proteina gutxi; beraz, ez du balio kaloriko handirik.

Bitaminetan aberatsa da, batez ere A probitamina eta, proportzio txikiagoan, C bitamina eta B taldekoa. A probitamina edo beta-karotenoa A bitamina bihurtzen da gure organismoan, behar duen heinean. Bitamina hori funtsezkoa da ikusmenerako, larruazala, ilea, mukosak eta hezurrak egoera onean edukitzeko eta sistema immunologikoak ongi funtziona dezan. C bitaminak lagundu egiten du kolagenoa, hezurrak, hortzak eta globulu gorriak sortzen, eta lagundu egiten du elikagaiek burdina xurgatzen eta infekzioei aurre egiten. Bi bitamina horiek, gainera, funtzio antioxidatzailea betetzen dute. Era berean, azido organikoak (zitrikoa eta malikoa), pektina (zuntz disolbagarria) eta, gutxiago, taninoak ditu, astringentzia pixka bat ematen diotenak.

Mineralei dagokienez, potasioa du eta, proportzio txikiagoan, fosforoa, burdina eta zinka. Potasioa beharrezkoa da nerbio-bulkada transmititzeko eta sortzeko, muskuluen jarduera normalerako eta zelularen barruko eta kanpoko ur-orekan parte hartzen du. Fosforoa lagungarria da hezurrak eta hortzak behar bezala mineralizatzeko. Zelula guztien parte da, eta material genetikoaren osagai. Gainera, B taldeko entzima eta bitamina askoren aktibaziorako beharrezkoa da. Bestetik, zelulen metabolismorako beharrezkoa den oxigenoa garraiatzen laguntzen du burdinak. Azkenik, zinkak lotura zuzena du hazkundearekin, A bitaminaren jarduerarekin eta entzima pankreatikoen sintesiarekin.

Osasunerako propietateak

Fruta gozoa, freskagarria eta jateko erraza da, eragin antioxidatzailea duten substantzietan aberatsa. Hori dela eta, produktu hori kontsumitzea gomendatzen da, kontuan izanik, gainera, biztanle guztien nutrizio-ezaugarriak: haurrak eta gazteak, helduak, kirolariak, haurdun dauden emakumeak edo bularra ematen duten amak eta adineko pertsonak.

A probitamina ugari duenez, fruta egokia da bitamina horren gabeziak izateko arrisku handiagoa dutenentzat: gantz gutxiko dieta egin behar dutenentzat eta, beraz, A bitamina gutxi dutenentzat edo nutrizio-premiak areagotuta dituztenentzat. Egoera horietako batzuk dira hazkunde, haurdunaldi eta amagandiko edoskitze aldiak. Era berean, tabakoak, alkohol gehiegi edateak, zenbait sendagai erabiltzeak, estresak eta immunoeskasiak, jarduera fisiko biziak, minbiziak, hiesak eta hanturazko gaixotasun kronikoek aprobetxamendua gutxitzen dute eta mantenugaiak gaizki xurgatzen dituzte. A bitaminak eta C bitaminak eragin antioxidatzailea dute, eta hainbat gaixotasun izateko arriskua murrizten laguntzen dute; besteak beste, gaixotasun kardiobaskularrak, endekapenezkoak eta minbizia.

Azido zitrikoa, desinfektatzailea eta gernuaren alkalinizatzailea denez, hura kontsumitzeak ere lagundu egiten du giltzurrunetako kalkulu batzuk sortzeko arriskua murrizten (batez ere, azido urikozko gatzen konposatuak), eta onuragarria da hiperurizemia edo tanta izanez gero (azido uriko gehiegi ez izatea errazten du). Gainera, pektina asko duenez, ezaugarri laxanteak ditu, eta, horregatik, bereziki gomendatzen da idorreriarentzat.

Alkenjearen potasio-edukia dela eta, fruta diuretikoa da, eta bihotz-hodietako zenbait gaixotasunen (hipertentsio arteriala edo likido-erretentzioari lotutako beste batzuk) tratamendu dietetikorako gomendatzen da. Mineral hori suntsitzen duten diuretikoak baliatzen direnean ere kontsumitzea komeni izaten da eta, bulimia nozitzen denean, galera handiak eragiten dituzten goraldi autoinduzituengatik. Hala ere, mineral horren ekarpena mugatuta dago giltzurrun-gutxiegitasun akutua edo kroniko aurreratua dagoenean; beraz, erkameztiak neurriz kontsumituko dira kasu horietan.

Azkenik, bere osaketa dela eta, eragin diuretiko eta arazgarri leuna du; beraz, likido erretentzioa eta zistitisa (gernu infekzioak) izanez gero, bere kontsumoa gomendatzen da.